Life - A seesaw

Duniya ki iss bheed mein, safalta ki chah mein, hum bhi tez raftar se chale jaa rahe the.
Har cheez paane ki chah mein, rishtey kuchalti raah mein, ek ko dekh kar doosre ko chhale jaa rahe the.
Sapne itne bade the, ummeedien itni zyaada thi, unki aahooti chadhane mein hum pighle jaa rahe the.
Aag ki tapish mein, sholon ke aakrosh mein, hum sirf khade khade jale jaa rahe the.

Rishton ne karvat badli, apne paraye ho gaye, rishton k tarazu mein hum tule jaa rahe the.
Apno ka saath chhod ke, paristhitiyon ko mod ke, gairon ke beech mein ghule jaa rahe the.
Paise ki andhi daud mein, sab kuchh paane ki hod mein, apne aap ko hi hum bhoole jaa rahe the.
Apne sapno ki chah mein, saamne dikhti raah mein, apno ko andekha kar masti mein jhoole jaa rahe the.

Tabhi zindagi se mulaqaat hui, do pal usse baat hui. Usne dil ko aise chhua, laga dil ka koi bojh halka hua.
Aankhon se aankh mil kar jab, dil mein woh ghar kar gayee, yun laga maano ki aaj koi khaali jagah bhar gayee.
Uski baat mein sachchai thi, jo aaj samajh mein aayee thee, ki yahi duniya ki reet hai, is mein meri haar nahin yahi toh meri jeet hai.
Main uski baat sunta gaya, aur meethe sapne bunta gaya. Tabhi samajh aaya ki yeh sab ek chhalawa tha, woh meri zindagi ka paigam nahin, kisi aur zindagi ka bulawa tha.

Ab baat samajh mein aayee thee, aur aaj barso baad main roya nahin. Ki maine sab kuchh paaya hai aur kuchh bhi khoya nahin.
Rishton ki khaai paatne ko ab bilkul tayaar tha main, aur khud se milne ke baad shayad thoda hoshiyaar tha main.
Ab nayee raah par nikla tha, nayee manzilein paane ko. Paaya sab ko saath maine, apne gale lagaane ko.
Aaj sab kuchh hai mere paas, sirf ek baat se dukhi hoon. Par agar meri zindagi khush hai toh main sabse sukhi hoon....