Raaste mein chalte chalte, subah sham dhalte dhalte,
jab hum unse takraaye the
tab humne yeh jaana tha aur tab humne yeh dekha tha,
ki raaste ke saare phool humein dekh muskuraaye the
Un darakhton se hum guzre, un jharno ka paani piya,
unse kabhi kuchh na maanga bas jee bhar ke pyaar diya
haathon mein haath lekar jab woh saath hamare chalte the,
aankh band kar lene par kuchh meethe sapne palte the
us hari ghaas ki sez pe baith humne sapne sajaaye the,
ki raaste ke saare phool humein dekh muskuraaye the
Parvaton ne mere sur ko door door tak pahunchaya,
nadiyon ki khal khal ne apna ras bhi chhalkaya
apne saath lekar gayeen aur door samandar pahunchaya,
aur saagar ne saath diya toh raag nikhar ke aaya
panchhiyon ne hamare saath woh sur gungunaaye the,
ki raaste ke saare phool humein dekh muskuraaye the.
Ab un raaston par jhadte darakht dikhte hain, sookhe jharne milte hain,
ab woh zameen mujhse poochhti hai ki akele kahan chalte hain,
haath chhoot chuke hain, sapne toot chuke hain,
jinse kal takraaye the wahi aaj rooth chuke hain.
woh raaste ke phool ab murjha chuke hain,
kyunki us pal mein aane wale aaj muh pher ke jaa chuke hain.
